La ruta incluye una docena de plaques repartíes pel conceyu coles que s’intenta dar a conocer la creación lliteraria asturiana.
La iniciativa inaugúrase con un recital poéticu nel Monesteriu la Merced nel qu’habrá tamién acompañamientu musical Castrillón va inmortalizar dende esta selmana una docena de poemes d’autores d’Asturies.
Podrán vese n’otres tantes plaques repartíes per dellos puntos del conceyu.
La iniciativa conozse como Sienda de la Poesía o Ruta de la Poesía, y márcase’l doble oxetivu de dar a conocer la creación lliteraria del Principáu al empar qu’ofrez un incentivu pal turismu cultural de Castrillón.
L’estrenu oficial de la ruta va facese’l próximu domingu, 30 d’abril, a les 13 hores, con un recital poéticu nel que ta prevista la participación d’Ánxel Álvarez Llano, Mirta Chamorro Mielke, Paula Fernández Maseda, David Fueyo, J. Marce García Fernández-Luanco, María Esther García López, Aurelio González Ovies y Marisa López Diz. Los versos van contar con acompañamientu musical de la mano de Mestura, el dúu formáu por Marisa López Diz y Luis Manuel Suárez.
La iniciativa cuenta cola collaboración de l’Asociación d’Escritores d’Asturies y forma parte del proyectu Asturias, capital mundial de la poesía. Les plaques con poemes van poder visitase dende esta selmana nos puntos siguientes:
- Muséu de la Mina d’Arnáu – Aurelio González Ovies (ensin títulu)
- Monesteriu de Raíces – María Esther García López – Raíces
- Muséu d’Ancles – M-I.G. Austher – Amor y mar
- Sienda Costa Norte (Bahínas) – Mirta Chamorro Mielke – Lenguaje del mar
- Sienda de L’Agüil – Marisa López Diz – Nun son Ulises
- Plaza la Constitución – María Esther García López (ensin títulu)
- Escueles del Ave María – Aurelio González Ovies (ensin títulu)
- Parque La Deva – José Marce García Fernández-Luanco – Prado, mar y mimosa
- Playa de Muniellas – David Fueyo (ensin títulu)
- Senda Verde del Agua – Ánxel Álvarez Llano – Caminos de Agua
- Viesca Didáctica – Carmen Cabeza Martínez (ensin títulu)
- Casa del Peregrino – María Esther García López y Aurelio González Ovies – Camino de poetas
